La provincia de Lleón tien ún de los patrimonios documentales más importantes de la Península Ibérica. Esti patrimoniu foi dándose a la lluz nos caberos quince años na coleición «Fuentes y Estudios de Historia Leonesa», asoleyaos pol «Centro de Estudios San Isidoro». Gracies a ella, los filólogos puen algamar un pergrán corpus de testos -rigurosamente trescritos- que s'esparde dende les fasteres más occidentales (El Bierzo) hasta les más orientales (Sahagún) de la provincia, y que se desendolcó nuna dómina temporal de más d'ocho sieglos. Por ella mesma, ye una fonte indispensable pa estudiar y conocer el romance lleonés del pasáu. Esti trabayu céntrase n'analizar les peculiaridaes d'evolución que presenten dos rasgos gramaticales (infinitivos conxugaos y la variante lo pal artículu) en documentación lleonesa occidental, central y oriental redactada ente los sieglos XIII y XIV.